أميرة سعد الدين فرج تكتب : اعرف زرعتك
لما ابتديت ازرع ،بدأت بتربة بسيطة وصبار..بعدين حسيت انه زيي .صابر.ومش بيشيلك همه ..سقيته هينبسط اوي ويكبر ..سيبته هيستحمل اهمالك شوية قبل ما يظهر عليه علامات الاصفرار والذبول.
اتطور الموضوع اني كل ما الاقي طين ،ازرع واجرب وأقرأ عن كل زرعه ومواصفات تربتها وان السقي الكتير مش صح .ولا العطش الزايد صح …وأننا نسقي الزرع في الفجر أو المغربية .وكمان عرفت ان لو نقلت زرع بيزعل ويتأثر …وان حبك ورعايتك بيطمروا فيه.
طب ولادك!!!!!عرفت عنهم ايه؟
لازم تدرسهم زي الزرع …طباعهم ايه …(عصبي )وديه رياضة قتالية ؛خليه يتحكم في غضبه …(خجول) وديه في أي نشاط اجتماعي .طب لو خجول ومش عرف يبدأ الخطوة الأولى ؟بسيطة !!! اعزم زمايله وأبدأ بخطوة بالنسبة له مش عارف يتقنها.بعد كده هو هيتجرأ ويبدأ يتعرف على الناس .بيحب التفكير وحركة قليلة …انصحك بالشطرنج …ومبدع وغاوي أي نوع من الفنون …وديه المكتبات العامة أو مدرسين يدربوه على الهواية اللي بيحبها.
كمان لاحظ اذا بيحب المطبخ …شجعه ….اذا عنده روح القائد …وزع عليه مهام وشوف تنفيذه ازاي؟
ساعده يكتشف ذاته …خليه فاهم نفسه ….ساعتها هيفهم عيوبه ومميزاته…موطن قوته،ضعفه،تميزه…ساعده انه يبدأ أول خطوة وبعد كده راقب ….وفي النهاية اترك ليه حرية التجربة .
استكشف ابنك أو بنتك زي ما بتستكشف زرعتك؛ لأن في النهاية هم حصاد سنين عمرك.
اقرأ أيضاً..تردد قناة الأقصى الجديد 2023..حملها الآن