“إحساسّك إيه”.. نص نثري للشاعرة صفاء أبوصبيحة
إحساس الراحة
مع فكِّة أول دبوس في الطرحة
بعد نهار شقّ عليا
إحساس الحرية
مع قلع التوكة وسيبان شَعري على راحة نفسُه
إحساسي لما ابقى ف أوضتي
بتكلم
أو ما اتكلمش
بتألم من غير ما أعيط
أو بضحك
أو ماتألمش
إحساس الوحدة وونس الوحدة من غير مونولوج يجرح صاحبُه
إحساس الورد
تعويرة كبيرة خَلَفها الورد ف ضمة إيدي وضمة قلبي
القعدة معاك بتساوي القعدة قصاد البحر
بتحب البحر؟
* في حد يحب البحر يخاف؟
-مانتاش خواف
خليني اوصفلك بالراحة
زي اما تكون في بلاد رحبة
وتحس طراوة وحنية عماله بتنشع م الطرقات
بتقول خليك.. أشبع منك..
إحساس الروح اما بتشبع من طعم الروح
إحساس القلب اللي بتسقيه
من إيد بتحف ف إيد بالقصد
وتوهج حلو خفيف بينا من غير القصد
إحساس الضلة وبلة ريقي من الطلة
إحساسي بفستاني بيضحك ويطير فرحان
احساس باللحظة في نفس اللحظة من غير توهان
تنهيدة الناس لما بتوصل
ومشاعر ياما تفوت ع القلب اما بتسأل:
“إحساسِك إيه؟”